[ كتب قريتهم شهر جانفي ]

عسلامة ناس الكل، إنشاء الله تكونو لاباس 
émoticône smile

 ليوم بش نحكيلكم على الكتب اللي قريتهم في شهر جانفي..الشهر هذا على غير العادة قريت 5 كتب و الكلهم  بالعربي و للأسف نسخ إلكترونية, ماغير مانطول عليكم أكثر خليني نبدا نقدم الكتب

1- حبيبي داعشي للكاتبة هاجر عبد الصمد. 
الرواية تحكي على مرا معرسة كانت تعيش حياة عادية و سعيدة حتى جا نهار لقات روحها مطلقة و الناس الكل تعامل فيها على أساس هي المذنبة الوحيدة، دخلت في حالة إكتئاب الشيء اللي سهل عملية استقطابها لتنظيم الدولة الإسلامية. الرواية تناقش عدة مواضيع و تطرح عدة قضايا رغم غياب عنصر الإثارة في سرد الاحداث و رغم الأخطاء اللغوية العديدة. 

2- كش ملك لأحمد خيري العمري. 

الكتاب هذا يتناول علاقة الإنسان بالشيطان على أنها ملحمة شطرنج بأسلوب سلس و بسيط. ننصح بالكتاب هذا خاطرو يوضح عديد النقاط في علاقة الإنسان بخالقه و يساعد في التغلب على وساوس الشيطان اللي مايهدالو بال 

كان كي يبعدنا على الصراط المستقيم و على طريق الحق.

3- في عقيدة الحب كلنا يهود للكاتب معجب الشمري. 
الكتاب عبارة على مجموعة قصائد حب يناجي فيها الكاتب معشوقته. الكتاب عادي برشا رغم الصدى الكبير اللي عملو. 

4- حبيبتي بكماء لمحمد السالم. 
الكتاب هذا نصحني بيه صديق و كانت غلطة عمري اللي أنا قريتو، خاطر دخلني في حالة نفسية خايبة برشا.. من ناحية الأسلوب و التشويق الكاتب أبدع ما نجمش نقول العكس، إتقان الوصف و اللعب بالكلمات و كل شيء يخلي الرواية تنجح موجود. أما بالنسبة ليا أنا يمكن أخيب رواية رومانسية قريتها في حياتي ! كمية الجبن و النذالة اللي يتمتع بها البطل ( الأكيد اللي هو مش بطل) لا توصف و ما عندو حتى مبرر غير أنو رجل شرقي ينجم يعمل اللي يحب و حد ما يلومو. ننصحكم تقراو الكتاب خاطر نحبو ولا نكرهو هاكا الواقع متع المجتمعات الشرقية. 

5- الفيل الأزرق لأحمد مراد. 

أنا مالمعجبين متع الكاتب هذا خاصة اللي أعمالو تخلي فيا أثر كبير. 
الكتاب يحكي على طبيب نفساني انقطع على ممارسة الخدمة متاعو لأسباب معينة ، رجع بعد 5 سنين باش يلقى صاحبو في مستشفى الأمراض العقلية متهم بجريمة قتل، و ماللحظة هذيكا حياتو تقلبت 360 درجة. الرواية ياسر محلاها مشوقة عاللخر تخليك تتسائل برشا على غياهب النفس البشرية و تلوج على أجوبة اللي تنجم تكون مش موجودة. 

أعطيوني رايكم فالرفيو و في الكتب كان قريتو أي واحد منهم. ليلتكم زينة :)